Il-Qbiż tal-Ħabel

Dwar Il-Qbiż tal-Ħabel

Il-Qbiz tal-Ħabel (skipping rope)f’xi forma jew oħra ilu magħna minn żmien żemżem u ħadd ma jaf fejn jew meta tnissel; imma nafu li l-Feniċi u l-Eġizzjani kienu jaqbżu l-ħabel. Fl-Ewropa din l-attività saret popolari fost l-Olandiżi, li fis-sittax-il seklu ħaduha magħhom l-Amerika. L-Ewropej kien ilhom jaqbżu l-ħabel sekli, imma l-Ingliżi ma kinux dilettanti wisq, u aktarx li ma kinux huma li daħħlu din l-attività f’Malta fejn damet popolari għal snin twal.

Kif isir Il-Qbiż tal-Ħabel

Hemm diversi modi kif din l-attività kienet issir. Kien jintuża ħabel twil bi tnejn min-nies, xi tnax-il pied imbegħdin minn xulxin, iżommu tarf kull wieħed. Dawn it-tnejn min-nies kienu jdawru l-ħabel b’mod li dan jifforma ark u jaqbdu ritmu. Waqt li diversi għanjiet kienu jitkantaw, il-parteċipanti kienu jaqbżu l-ħabel flimkien meta l-ħabel kien ikun fil-baxx jew imiss mal-art. Jekk ma taqbiżx fil-waqt preċiż, kont itellef ir-ritmu tat-tidwir tal-ħabel u jeliminawk mil-logħba. Dan kin ikompli sakemm ikunu eliminati l-kompetituri kollha barra waħda, li, kienet tkun ir-rebbieħa.