Brilli

Dwar Brilli

Il-Brilli, li mkien fid-dinja m’hawn eżatt bħala, tintlagħab b’dawk li bl-Ingliż jgħidulhom ‘skittles’ . Il-logħba tal-Brilli ilha magħrufa sa minn qabel ma ġew il-Kavalieri ta’ San Ġwann u tixbah lit-10-pin bowling li jintlagħab taħt is-saqaf, imma tintlagħab għall-apert. Jintużaw disa’ brilli u ballun tal-injam. Ir-regoli huma kemxejn ikkumplikati.

Kif Tilgħab Il-Brilli

Il-brilli jkunu skjerati f’forma ta’ djamant-kwadru, fi tliet fillieri bi tlieta. It-tir tal-logħba huwa li twaqqa’ l-brilli u ttella’ l-punti. Biex jirbaħ, min qed jilgħab irid itella’ 24 punt eżatt. Jekk xi ħadd itella’ aktar minn hekk, ikun eliminat sal-logħba li jmiss. Hemm brilli differenti li għandhom isem u jiswew punti differenti. Tan-nofs jissejjaħ ‘is-sultan’ u jiswa 9 punti. Il-brilli tat-truf jgħidulhom ‘sekondi’ u jiswew 6 punti. Il-bqija jgħidulhom ‘qarmuċ’ u jiswew punt wieħed biss.

Kull parteċipant jilgħab darbtejn. L-ewwel darba jitfa’ l-ballun min post miftiehem minn qabel u t-tieni darba minn fejn ikun waqaf il-ballun. Biex il-logħba tkun aktar interessanti, l-ewwal tefgħa tagħti aktar punti mit-tieni waħda: ittik id-doppju tal-punti. Imma, jekk jekk iktar minn tip wieħed ta’ brilla jitwaqqa’ fl-ewwel tefgħa (is-sultan, is-sekondi u l-qarmuċ), min qed jilgħab jieħu biss 2 punti ta’ kull brilla.

Is-sempliċità ta’ din il-logħba flimkien mas-sistema ta’ punteġġ interessanti u l-ħtieġa li tuża l-istrateġija iġegħlek tilgħabha u terġa’ tilgħabha. Għaliex m’għandikx tieħu gost tilgħabha u, fl-istess ħin, tgħin biex iżżomm ħajja din it-tradizzjoni li bħalha m’hawnx? Logħba li tagħti pjaċir immens!